[转]海墘閩語論壇bbs的注册须知（很有意思）
汝好，歡迎來海墘閩語論壇行踏踅佚佗～～海墘閩語論壇（简称“海墘”）是福建“閩系母語文促進會”佇西元2007年熱儂的時陣所開辦的一个專題議論“閩語”的BBS，嘛是現子時網路頂懸上蓋出擢（chhut-tioh）的“閩語BBS”。假使咱若有想卜加瞭解一寡閩語的智識，有卜佮儂交換意見，抑是講想卜將咱知影的有關閩語的智識佮別儂來做分享，按呢，汝著會當加入海墘即个社區。為著卜創造佮維護海墘的價值，阮誠心建議汝佇咧登記進前，斟酌來閱讀下底幾項聲明。
1）假使汝是新來的，汝對閩語有興趣，阮攏真心歡迎汝加入阮的社區。汝隨時會當佇遮登記汝的戶頭（口座）。汝會揀一寡汝較合意的、儂較好認的ID。提醒咱逐个毋通登記迄號帶有“詈罵（lóe-mē）、譬相（phì-siùⁿ）、經體（keng-thóe）”的字眼；為著避免造成誤解佮困擾，嘛請逐个盡量 mài用一寡“地号名”、“族群名”來做家己的ID。阮無反對社員用替身，不而過，斷斷毋通利用替身為非糝作、惹禍生端。歹聽話講進前，咱遮毋是巴剎菜市口，無咧拍拳賣膏藥，若有儂想卜佇遮吹銷做廣告，勸伊趁早死心，若無，阮會將伊的戶頭連帶所留落來的糞掃做一下戽出去。
2）海墘是單純議論語言學的社區，阮提醒社員佇咧開講的時陣，盡量較mài牽涉著政治、族群佮儂種即款傷感情的話題。佇遮，儂儂平等，毋管是新社員，抑是老社員，逐个著愛有禮貌，著愛謙卑，著愛互相尊重，毋好相格氣。版主、社員攏會當盡家己的能力回答別儂的問題，毋通展大塊、格氣頭。
3）海墘的智慧，天下間的儂攏通分享，請逐个佇咧轉載的時陣，愛尊重智慧財產權，注明資料的來源。社員愛為家己的言論、家己的所行，負完全的責任。海墘乾凋提供議論空間，對社員的言行，無咧負責任。
4）海墘有管理團隊，無獨裁者。阮主張就事論事，對事無對儂，毋准任何的人身攻擊。管理人員權力分散，各級人員照制度辦代誌，照各儂的職務執行版務，接受民主監督。特別卜聲明一下，海墘毋是政治宣傳的工具，毋是打壓異論的所在，毋是摳洗別儂的秀場。
5）雖然講，海墘自來攏是主張言論自由，總是，阮嘛有家己的觀點佮立場。阮佇遮聲明，凡若牽涉著以下內容的主題，一律筅捒；較嚴重的，阮凡勢會凍結事主儂的ID：第一，主張殺滅地方語言做代價來咧推普的，抑是講替即款做法咧辯護的；第二，刁故意使弄、製造語言優劣（iu-loa̍t）論調的，糟蹋、經體、譬相別儂的腔口；第三，哭衰“閩語羅馬化”的。
6）海墘閩語BBS所議論的主題，主要是牽連著靠海線的閩語（海系）。地理闊度來講，頂，去遘寧德、浙南；下，來遘潮州汕頭、雷州海南。總是，有噹時仔，阮儕少嘛會講著內陸的閩語（陸系）、客語佮畬語。假使汝佇海墘暫時chhē無汝合意的迄種語言的專欄，請汝諒解，這毋是阮刁工共伊放bōe記，實在是眼時前議論即種語言的主題猶無夠儕，無法度開辦專欄，不而過，這斷無代表日後毋開辦。
互海墘成做當今網路頂懸一粒一的閩語文化粟倉，是阮的目標佮追求。佫一擺感謝汝的捧場佮鼓勵！感謝！
